Mat deem neie Gesetz iwwert d’Héichschoulboursen mussen d’Studenten dem Staat d’Halschent vum Steierkredit “Kannerbonus” zeréckbezuelen! Dëst mëcht e Betrag vu ronn 500 € d’Joer aus, oder fir d’ganz Studienzäit 2 500 € bis 3 500 €. D’adrenalin – déi jonk adr – fuerdert, dass d’CSV-LSAP Majoritéit dës Moossnamen, wou de d’Staat de Studenten déif an d’Täsch gräift, direkt zréck zitt!

D’adrenalin ass iwwert d’Spuermoossnamen, sou wéi se an der Tripartite vun der Regierung virgeschloe gi sinn, méi wéi erféiert. D’Kris dierf net um Bockel vum klenge Mann a vun der Jugend ausgedroe ginn!

Et kann einfach net richteg sinn, datt grad bei der Zukunft vun der Jugend gespuert gëtt. Et ass net akzeptabel, datt d’Kannergeld nëmmen nach bis 21 Joer ausbezuelt soll ginn an d’Allocatioun fir de Schoulufank fir e Groussdeel vun de Schüler ewechfale soll.